Turkmensahra

  ترکمنصحرا
TÜRKMENISTANDA GEÇIRILJEK PREZIDENTLIK SAÝLAWLARYNA


Türkmenistanyñ Birleşen Demokratik Oppozisiýasy (TBDO) Türkmenistanda 2007 ýylyñ 11-nji fevralynda geçiriljek prezident saýlawlaryna kandidatlyga öz adyndan Türkmenistanyñ ”Agzybirlik” Demokratik Halk Hereketiniñ baştutany Nurberdi Nurmämmedovy hödürleýär.
 
Nurberdi Nurmämmedov 1943 ýylda Aşagabat raýonynyñ Akdaşaýak obasynda dogulýar. Ol 1970 ýylda Türkmenistanyñ Oba hojalyk institutynyñ transport bölümini tamamlaýar. Soñra ýurduñ transport pudagynda zähmet çekýär. Ol 1984-89 ýyllar aralygynda Türkmenistan SSR awtomobil ýol transporty Ministrliginiñ Merkezi proekt-konstruktorlyk burosynyñ direktory wezipesinde işleýär. Türkmenistanda demokratiýa, söz, metbugat azatlygy ugrundaky syýasy göreşe goşulanlygy üçin öz wezipesinden çetleşdirilýär.
 
Türkmenistanda S.Nyýazovyñ guran despotçylyk rejimine garşy batyrgaý we durnukly göreşiji hökmünde halka özüni tanadan N.Nurmämmedov 1989 ýyldan bäri Türkmenistanyñ ”Agzybirlik” Demokratik Halk Hereketine baştutanlyk edip gelýär. Bu döwürde ol özüniñ liderlik zehinini doly görkezdi. N.Nurmämmedov Türkmenistanda demokratik gymmatlyklaryñ, azatlygyñ ideallarynyñ we adam hukuklarynyñ dabaralanmagy ugrunda köp işleri bitiren adam. Türkmenistanda hukuk döwletiniñ gurulmagy ugrundaky alyp barýan yzygiderli göreşi oña halk arasynda we demokratik oppozisiýanyñ hatarlarynda uly abraý getirdi. Onuñ ady ýurduñ çäklerinden uzaklarda-da gowy tanalýar.
 
Alyp barýan syýasy-oppozision işi üçin N.Nurmämmedov birnäçe gezek tussag edilýär. Soñky gezek ol 2000 ýylyñ ýanwarynda galp aýyplamalaryñ esasynda 5 ýyl türme tussaglygyna höküm edilýär. Ýöne Halkara jemgyýetçiliginiñ we Adam hukuklaryny goraýan Halkara guramalaryñ zor salmagy astynda şol ýylyñ ahyrynda azatlyga goýberilýär.
 
Türkmenistanyñ Birleşen Demokratik Oppozisiýasy 2006 ýylyñ 23-nji dekabrynda ”Azatlyk” radiosynda çykyş edip, ýurtda söz, metbugat azatlgynyñ yglan edilmegini, syýasy tussaglaryñ türmelerden boşadylmagyny talap edenligi üçin gaýtadan bikanun ýagdaýda tussag edilen N.Nurmämmedovy şu ýylyñ 11-nji fevralynda geçiriljek prezidentlik saýlawlaryna kandidatlyga hödürleýär. Prezidentlige hödürlenen dalaşgärleriñ hatarynda öz kandidatlyk borjuny berjaý etmegi, saýlawçylar bilen duşuşyp, olara öz programmasyny ýetirip bilmegi üçin N.Nurmämmedov tizden tiz tussaglykdan boşadylmalydyr we oña beýleki kandidatlar bilen deñ şertler döredilmelidir!
 
Türkmenistanyñ Birleşen Demokratik Oppozisiýasy Günbataryñ öñdebaryjy demokratik döwletleriniñ baştutanlaryndan, Birleşen Milletler Guramasyndan we Europada Howpsuzlyk we Hyzmatdaşlyk Guramasyndan Türkmenistanyñ prezidentligine kandidat Nurberdi Nurmämmedovyñ günübirin tussaglykdan boşadylmagyny talap edip, Türkmenistanyñ wagtlaýyn hökümetine syýasy basyş görkezmeklerini towakga edýär!
 
Biz Türkmenistanyñ ilatyny öñdäki prezident saýlawlarynda demokratiýa ugrunda ýanbermez göreşiji Nurberdi Nurmämmedovyñ kandidaturasyny aýgytly goldamaga çagyrýarys!
 
Türkmenistanyñ Birleşen Demokratik Oppozisiýasynyñ lideri Avdy Kulyýev,
Norwegiýa, 2006 ýylyñ 26-njy dekabry
Telefon: +4722741185
Mobil:    +4746473207   
E-mail: avdy_kuly@hotmail.com


[ نسخه قابل چاپ ] [ اين متن را با ايميل بفرستيد ] [ بازگشت به صفحه اول ]

استفاده از مطالب اين سایت با ذکر منبع بلامانع مي باشد