بويلاريم بوكولدي ياد اولكه¬ لرده،
آيراليغينگ درياسيني بويلاديم.
ساغ بول، انه ديليم، باقي بويسانجيم،
سن منگ يوره گيمي يكه قـويمادينگ.

كأ سيريـليپ چيقـدينگ قيندان قـليچ دك،
كأ قيزيـل گول بولدونگ، كأ ياشيـل ياپراق.
ايكأ بؤلونـنده توركمن توپراغي،
انه ديليم، بولدونگ بؤلونمز توپراق.

انه ديلده يايان شاتـليغيم، غـوصصام،
آراچاكده بودرأپ قالاندا گؤزلر.
آرزولارمينگ گچيپ بيلمه¬ ديك گوني
تيكه¬ نكلي سيملري بؤسوپدي سؤزلر.

گوللـه كأر اتمه دي يوفـك هنـنگينه،
اؤلدورمه دي قانيملارينگ بوغـماسي،
شيدائي¬نينگ آخميري- گؤزل ييگريم بأش-
بولدي توركمن يوره كلرينگ تاغماسي!

قـايرادان-ايلريك، ايلردن- قـايراق،
آراچأگـي بؤوسدي اركيـن يه ل يالي.
آدم يوره گينده سؤيگـي اركيندير،
باشغـا اركينليك يوق انه ديل يالي.

ماغـتمغـولينگ سؤزلرين دينگله¬دينگ،،
انه ديليم، سندن منگ تامام اولي.
تـنيم تابشيريلار بير گون توپراغـا،
يـؤنه سانگا تابشيرارين روحومي

.
آ. گـــورگـــنــلــي ا- نجي ژانويه 1998
گوتـنـبرگ- سوئد
 

     Ene dilim

Boýlarym büküldi ýat ülkelerde,
Aýralygyñ derýasyny boýladym,
Sag bol, ene dilim, baky büýsanjym,
Sen meñ ýüregimi ýeke goýmadyñ.

Kä syrylyp çykdyñ gyndan gylyç dek
Kä gyzyl gül bolduñ, kä ýaşyl ýaprak.
İkä bölünende Türkmen topragy,
Ene dilim, bolduñ bölünmez toprak.

Ene dilde ýaýan şatlygym, gussam,
Araçäkde büdräp galanda gözler.
Arzularmıñ geçip bilmedik güni,
Tikenekli simleri böwsüpdi sözler.

Gülle kär etmedi yüpek heñiñe ,
Öldürmedi ganımlarıñ bogmasy,
Şeýdaýynyñ ahmyry –
«gözel ýigrim bäş»-
Boldy Türkmen ýürekleriniñ tagmasy.

Gaýradan-ilerik, ilerden-gaýrak,
Araçägi böwüsdi erkin ýel ýaly.
Adam ýüreginde söýgi erkindir,
Başga erkinlik ýok ene dil ýaly.

Magtymgulyñ sözlerin diñlediñ,
Ene dilim senden meñ tamam uly
Tenimi tapşyrlar bir gün topraga
Ýöne saña tapşyraryn ruhumy.


1998-nji ýylyñ 1-nji ýanwary
Göteborg. Sweden